Како и что напишем к твоей бесовской гордости,
Аки к некоей неученной конной борзости?
Иже самого коня в пропастный ров вметает
И всадника на нем погубляет,
Такоже и твоя безумная гордость ум твой заношает
И благородную твою душу во ад низпосылает.
За что тако гордишися и возносишися,
И таковою славою нелепою обносишися?
А сам еси многому божественому учен,
Да почто таковою лютою страстию аки в волчию кожу оболчен?
И паки много богодухновеннаго написаннаго веси,
Мню, яко всевают ти в сердце твое таковую страсть лукавыя беси.
И каков еси взором и видением,
Таков еси и бесовским тем лютым кичением.
Скажи ны, что еси и откуда учинен?
Не от того же ли общаго нашего творца содетеля сотворен
И на сотворенную им землю пущен?
И на се нам имети ум свой совершен.
Не такоже ли земля еси и пепел?
И почто таковою безумною гордостию своею усвирепел?
Не такоже ли кал еси и смрад?
Почто оскверняеши душевный свой виноград?
Или богат и честен зришися?
И почто таковою лютою страстию побеждаешися?
Все богатство твое с тобою в погибел да будет,
А лукавая твоя душа наипаче вечных мук не отбудет.
Помяни прежних гордых и злых царей,
Аки лютых и неистовых зверей.
Како за злую свою гордость зле погибоша,
И во адову пропасть душами своими снидоша.
А ты пред ними — обычная чета,
Тако творя не надейся же вечнаго живота.
Первие помяни, за что Денница
[16] с небеси свержен
И во дно адово ввержен,
И ныне нерешимыми узами связан,
И от главы и до ногу обязан,
Последи же мучен будет в безконечныя веки
И с подобными ему человеки.
Помяни, за что фараон в мори потоплен
И со всем своим воинством водою покровен,
[17]И ожидает вечных мук.
И всяк возносяйся такоже не избудет от бесовских рук.
Помяни, за что Навходоносор царь в вол претворен
И на времена царства был лишен,
И аще бы пред богом не смирился,
То бы на веки во ад вселился.
И не бы был устроен попрежнему во свое царство,
Понеже и всякого человека возношает многое богатство.
Яко же и ты, как учал быти богат,
Так учинился еси аки рогат.
Зри, яко может бог и не тебя смирити
И по предваршему в нищете тя учинити.
Помяни, за что гордый Антиох зле живот свой испроверже,
Сам себе в сердце свое ножем вверже
[18].
Тако же во дне ада до века пребывает,
И вечных и нестерпимых мук ожидает.
Помяни, за что Озия учинися прокажен,
Подобно же тому и ты тем обложен.
[19]Аще еси таковое злодейство твориши,
То гордостию своею такоже душу свою погубиши.
Помяни, за что окаянный Ирод жив червми снеден,
И такоже во дно адово сведен.
И ныне у самого сатаны в коленех седит,
И сам пред собою свою гибель зрит.
И много таковых в тогдашнем и нынешнем веце,
Добро убо есть смиреномудрие в всяком человеце.
Видиши ли, каковы быша велики,
А не сподобился со избранными лики.
И своею гордостию и высокоумием туне погибоша,
Такоже и, преже рехом, душями своими во дно адово снидоша.
Зри сего и внимай,
И создателя своего не забывай.
Всяко высокоумие в человецех мерзко есть пред ним,
А мы сами себе превыспренно мним.
Что же великий апостол Павел пишет,
Яко драгим бисерием нижет:
Гордость всяку отложше и удобь обратный грех,
Понеже гордый и величавый бывает в посмех,
Последи же зле потребляется
И душею своею во ад низпосылается.
[20]Почто аки водный говор надымаешися
И умом своим паче своея меры возношаешися?
Почто нами, последними четами, гнушаешися
И тленным своим богатством возношаешися?
Не веси ли, яко тленное богатство ржа и тля?
[21]Едина добродетель богу, та будет без тля.
И не хощеши нас нарещи прямым званием,
Но раковым и юродивым нарицаеши нас именованием.
И кличеш нас к себе, аки псов,
И гордостию своею держиш в сердцы своем, аки усов.
Аще бы еси сам не имел таковаго нелепаго порековала,
То бы безумная твоя гордость тако и нас не нарекала.
А то сам еси нелепым прозванием словешь,
Общее естество раккою
[22] зовешь!
О прочем же помолчим,
Да в конец безумие твое обнажим,
Понеже вси есмы повинни греху,
А таковою страстию такоже не быти вверху.
Лишись, лишись таковаго обычая и нрава,
Да будет ти от мук вековечная избава.
Аще ли утвержением злаго своего обычая не хощеш лишитися,
То зле будет во гроб тебе вселитися,
Зане господь бог гордости и величания не любит,
Всяк бо царство небесное добродетелию купит.
И паки гордым бог противляется,
[23]И всяк возносяйся и нехотя смиряется.
И паки гордость никому добра не сотворяет,
Токмо душу во ад низпосылает.
Или не веси, яко бог мертвит и живит,
И всех нас сердца нашя и мысли зрит,
И богатит, и убожит,
А благодатному человеку лета умножит?
Яко же глаголет божественная Анна,
Душа бо ея пред богом аки небесная манна.
Глаголет в третей своей песни,
Словеса бо ея пред богом нелестни:
Сице не хвалитеся и не глаголите высокая в гордыни!
[24]Мы же глаголем: добро убо есть жити в душевней простыни.
Зле же в гордости и в лукавстве пребывати,
Такоже и в неправедном богатстве дни своя изживати.
Паки та же святая Анна глаголет,
Яко же некоим осном колет:
[25]Ни да изыдет велеречие из уст ваших,
Якоже видех при очесех наших.
Когда еси был небогат,
Тогда никому был супостат.
Не токмо небогат зрелся,
Но рад бы тогда был како и наелся.
Ныне же по царьской милости обогател,
Того ради нами, убогими, и возгордел.
Может бог, дав, и отняти,
А несотворшему добра, добра не видати.
Хотехом было с тобою знатися,
Ино несть мочно убогому з богатым соединятися.
Ниже достоит с ним дружбы имети,
Комуждо своя верста знати,
И выше себе не искати.
Яко же глаголет премудрый Исус Сирах,
Понеже всегда богатый убогому бывает страх.
Глаголет же убо: з богатым дружбы не имей!
[26]Того ради и ты по сему разумей.
И паки несть мощно агньцу с волком жити,
Такоже и убогому з богатым дружбу чинити,
Еще же смиренному з гордыми и величавыми
И нравы и обычаи лукавыми.
Или кому, последней чете, з благоплеменитым знатися,
Но достоит от них удалятися.
Понеже они таковыми гордят
И глаголати с ними не хотят.
Тем довлеет всякому свое число лобзати,
И на бога вся упования полагати,
И у него милости и заступления прошати.
Тот может все, и кому благодать свою дати,
И убогих сирот обогащати.
Той паки — всем промышленник и питатель,
Понеже — общий нашь творец и зиждитель.
О всех нас промышляет,
И на всех нас милосердым своим оком призирает,
И повелевает нам в дом свой к себе приходити,
И чтоб тебе беседа с нами чинити,
И в препирателных словесех нас уничижати.
Или будет в мале нас хощеши напитати,
И тебе нас тем единем часом не накормити,
Вемы бо, что хощещ, нас чем любоукорити.
И паки единем словом нас яко утешаешь,
А другим аки ножем в сердце уязвляешь.
Ино лучше убо есть ничтоже даяти,
Нежели досадителными словесы разсужати.
И сие писанейце во уме своем разсужай,
И сам себе вразумляй.
Гордость николи добра не приносит,
Разве душу во ад низносит.
Того ради нрава и обычая таковаго лишися,
И под крепкую руку божию смирися,
И будет ти зде и тамо благо,
Понеже смиреномудрие всегда драго.
И да не прийдеш в первое свое достояние,
И от всех людей будешь в посмеяние.
И сие писанейце писано к тебе досатително,
Обаче будет тебе и вразумително,
Понеже от таковыя страсти возбраняет
И твое безумие обличает.
Аще еси много разумеешь божественаго писания,
Но не можешь стояти противу бесовскаго запинания.
Всякому бо человеку такову страсть в сердце всевают,
Тем от творца нашего и содетеля далече нас отвращают.
Аще ли послушает сего нашего к тебе речения,
Да избудешь оного вечнаго мучения.
Аще не послушавши, сам веси,
Что всевают таковую страсть в сердце твое лукавыя беси.
И ты мужайся и укрепляйся,
И против общих супостат, радуяся, вооружайся.
И таковей страсти не давай в себе прохода,
И молися Христу богу до последняго своего душевнаго исхода.
И да будеши сын света,
И да сподобишися праведных совета.
И вящи же того не имам, что к тебе писати,
Затченых убо ушес не наказати,
Такоже гордых и величавых,
Таковии бо не приемлют словес здравых:
На свою гордость и упрямство уповают
И добро аки худо вменяют.
Аще ли возносишися своим отечеством,
Но грехом своим нелеп еси уродился человечеством.
Тако бо есть от бога первый дар.
А гордому обличителныя словеса бывают в пар.
И сему писанейцу — конец.
А творящему злое не будет от бога венец.
