Вы же, малыя отрочата, слышите и разумейте и зрите сего
Сия зримая малая книжица,
По реченному — Алфавитица,
Напечатана бысть по царьскому велению
Вам, младым детем, к научению.
Ты же, благоумное отроча, сему внимай
И от нижния степени на вышнюю восступай,
И неленостне и ненерадиве всегда учися,
И дидаскала своего во всем добрем наказании блюдися,
И паки не супротивляйся ему в добрых ни в чем,
Наипаче преклоняй ему выю свою во всем.
Потом научишися от него и прочему божественному мудростному писанию,
И вси людие воздивятся твоему к нему повинованию.
И тако достигнеши мудрых мужей совета,
И будеши истинный сын света.
Ничто же убо вящи божественаго повеления,
Тако же ничто же дражае добрастнаго учения;
Паче же сего словесней нашей души,
Ты же, младый отроче, крепко сему внуши.
К мяккому воску чисто печать воображается,
Тако же и учение во младости крепце вкореняется.
Сего ради во младых ногтех учению прилежи
И всякое детьское мудрование от себе отложи.
Аще научиши себе во младости,
То будет ти покой и честь во старости,
И тако хвалим будеши от всех,
И да будут словеса твоя аки мед во устех.
И тем творца своего и бога воспрославиши,
И душу свою чисту пред ним предпоставиши.
Аще еси исперва не разумел сего прочести,
То ныне будеши очеса своя привнести.
Но узриши, яко по делу и по действу сложено
И к вашему учению добре сведено.
И первие начинается вам от дидаскала сей зримый «аз»,
Потом и на прочая пойдет вам указ.
. . . . . . . . . . . . . . . . . . . .
. . . . . . . . . . . . . . . . . . . .
