Сотворих аз небо и землю,
Да человеки сими вразумлю.
На небесное украшение смотряют,
Да мене, истиннаго Бога, познавают.
Владею небом и землею
И вся яко хощу сотворяю.
В рай вселих Адама со Еввою,
Они же преступиша заповедь первую.
Адама ради во плоть облекохся,
Их ради вины ко кресту пригвоздихся.
Восхоте Адам быти богом, и не бысть.
Сего ради райския одежды лишен бысть.
Сего ради вси греху повинни быша,
Делати землю им осудиша.
Много во аде пребыша,
Дондеже мя во плоти узреша.
На се бо на землю приидох,
Праведных души из ада извлекох.
Да вражию лесть побежду
И мир от работы его свобожду;
Дам вам крест мой — оружие,
Да бежит от вас насилие вражие.
Крепкую веру имейте,
Сим врага побеждайте.
Аз вас ради крест претерпел,
Вас в познание ко Отцу привел,
Дорогою ценою искупил —
Кровь свою вас ради излил.
Ядите тело мое и пи<й>те кровь мою,
Но да творите волю мою.
Тако бо вас возлюбих,
Яко и жити в вас изволих.
Вас ради небо и землю сотворил
И винограды многи насадил.
Да мя во псалмех восхваляете
И враги ваша посрамляете.
На небе аггельское пение,
На земли человеческое хваление.
Смотрите на птицы небесныя, —
Хоть суть безсловесныя,
Во свое время почивают,
День и нощь воспевают,
Вам образ показуя,
Самех себе ползуя.
Каков труд святии подъяша,
Вам ко спасению путь показаша,
Ныне почивают,
Со аггелы пребывают.
Тацы же плотни быша,
Телеса своя утончиша.
Они составиша чтение и пение,
Вам желающе спасение.
Дах вам пророк и учителей,
Ходатаев имате святителей.
Их на помощь призывайте,
А учение их не забывайте.
Оныи бо престолу моему предстоят,
За вас мене, Творца, молят.
Аз же долго терплю,
Да грешных не потреблю.
Да ко мне обратятся
И истинно покаются.
Аще будет истинное покаяние,
Не будет грехов вашим поминание.
Вы же сопротивно творите —
Заповеди моя преступаете.
Воспомяните первыя народы,
Сицевые онех доводы,
Зане от нечестивых царей гонение и мучение,
За благочестивых же церьковное украшение.
Беззаконнии церкви разоряют,
Биют вас и укоряют.
Вернии же церкви созидают,
Мене, Творца, прославляют.
Какову ревность прежнии християне имели,
Чему ж вы, последнии, ослабели?
Вдегда же часы подносят,
Головы свои к ногам приносят.
Дайте образ з себе, церьковнии учителке,
Моих овец пастырие и предводителие.
Смотрите на владыку, —
Имеет ревность толику:
На всяку нощ полнощи востает,
Сна очима не дает.
Рече бо ми: се аз и дети,
Их же дал ти владети.
Некоторым сопротивно отвещаю
И писанием святых отец поношаю.
Со овец моих волну берете,
Дети и попадии украшаете.
Церькви мои яко хранилище имеете,
Корысти брать умеете.
Аще и великий праздник будет,
Церковь замкнена пребудет.
У пива, хотя далеко ехат не обленится.
На церковное служение разболится.
Воспоминайте первые роды,
На которых навел воды.
Престаните от обьядения и пиянства
И всякаго вражия лукавства.
Многажды мене прогневаете,
Страшнаго суда не воспоминаете.
Аще бы воспоминали суд и муки,
Престали бы зло творити ваши руки.
На хваление вас сотворил,
Да бых сатану и ангелов его посрамил.
Несть бо предо мною ничто же утаено,
Все будет во он день откровенно.
Огнь всякую пещ искусит,
Камение и горы сокрушит.
Огнь тьмами над сей зелнейший,
А дух над него зело силнейший.
Пшеницу соберу в мои житницы,
Горети будут чародее и еретицы,
Во огнь ввержени будут идолопоклонницы,
Тогож не избудут все беззаконницы.
Преподобнии смиреномудрено пожиша,
Веру чисту сохраниша.
Вы же ризное украшение,
Питие и сладко ядение, —
Оттоле гордыня зависти и закона преступление.
Писания книг ленитеся прочитати,
Прилежнее шахматы и карты играти,
Гнилыи словеса изо уст вещати,
Не точию сами, но и юным запрещати.
Во отцех безстрашие велико,
В детех дважды толико:
В домех и по улицам скверно вещают,
А в церкви стоя без страха пребывают.
По сему ложные християне почитаетеся,
Поне при кончине истинно покаитеся.
Вопроси жидов и еретиков,
И самих бесов,
Иже есть вам о сем наука —
Неложно и непременно, и конца неимущая грешным мука
Некоторыи и попы писание почитают,
Множицею заповеди преступают.
На то смотрячи миряне
Живут мало не якъ погане:
Игры, скаки, танцы и плясы,
Таковыи же настали времена и часы.
Ныне большую честь имеют,
Которыи и лгать умеют;
Божие и божиих уничижают,
Бесовских угодников похваляют.
Мало тех, яже глаголют о спасении души.
Глядит есть ли что в ковши.
Писание божественное умеют и почитают,
Сатанинских песней не отметают.
Власте ли гордятся
И святителя не стыдятся.
Аще бы святый Николае к нему пришол,
Он бы к нему с ызбы не вышол.
Егда же пиршество сотворяют,
Тогда другов своих встречают.
О, нынешний роде временный,
Колико от мене, Творца, почтенный?!
Доколе землю оскверняете,
Мене зело прогневаете?!
Уже удолии земныи кровию напоены,
Руце ваши суть осквернены,
Або всем пришол невинных плач до неба,
Престати от злоб комуждо потреба.
Многии Авелевой крови подобятся,
С Каином братоубийцею осудятся.
Что вам принесет широта земная,
А ще не постигнета небесная?
Ныне время имате к покаянию,
Настоящее мздовоздаянлю.
В чем тя застану, в том сужду,
В пришествии моем не пощажу.
Слышате святое писание,
Но не имеете упование.
Без боязни — по самохотию жисте,
Жизни вечныя не получисте.
Аки басни вменяли,
Жития своего не исправляли.
Жития конец приближается,
Тайна моя совершается.
Видите громы трескновение,
Страшнее будет земли горение:
С востока огненная река потечет,
На западе озером станет.
Тамо грешнии вогнани будут,
Никако мук не избудут.
Приимите зде наказание,
Да не будет в ню вогнание.
О сем труд ваш предлежит,
Дабы вам венца получить.
Не дивитеся, яже иноверны воюют,
Венцы вам ходатайствуют.
На небе войны не будет;
Аще кто в терпении зде пребудет,
Тамо радости насладится
И со аггелы водворится.
Многии безвинно кровь проливают,
Таковии аки мученики бывают.
Иноцы много труждаются,
А овыи единем часом спасаются.
Вернии воини на ратех убиенн бывают,
Преподобническия венцы восхищают,
За православие кровь проливают,
От небеснаго царя венца чают.
Изменники прелщаются,
К маловременным обращаются.
Таковых Церкви проклинает
И имен их не поминает, —
Со еретики почтены
И с ними будут осуждены.
Нам, православным, крепко стояти,
За благочестие головы складати.
Сии стишки скончеваю,
Благочестиваго царя величаю.
Он за благочестие стоит
И веру непозыблему держит,
Церкви святыи устрояет,
Златом и сребром украшает.
Подай ему, Господи, много лет царствовати,
Землю свою от иноверных обороняти,
Воев своих уряжати,
Врагов своих посрамляти,
Церкви Христовы украшати,
Иноверных во благочестие обращати,
Верных рабов жаловати,
Злых же наказовати.
Аще хощеши безъбоязнен быти,
Не восхоти зла творити.
Царь бо от Бога помазан,
И ты буди страхом его наказан.
Бога бойся, царя почитай,
Все злое от себе отсекай.
Сия творяй надежни будем,
В тишине, цоживше, пребудем.
И тако со Господем будем конца не имуща,
Дондеже узрим Христа грядуща.
Аминь.
