Суди, Господи, мя обидящия,
возбрани, Боже, мене борющия,
невинна суща.
Возми мечь и щит, стани в помощь мою,
взем оружие, яви милость Твою,
запни гонящих.
Рцы души моей: Аз есмь твой спаситель!
Сотвори, да всяк оныя гонитель
посрамлен будет.
Злаго ми любцы вспять да возвратятся,
яко пред ветром прах, да расточатся
в разныя страны;
ангел Господень их да оскорбляет,
ангел Господень их да погоняет
в тме путем ползким,
Яко ми сети пагубы сокрыша
и души моей всуе поносиша
зело досадно.
Ея же не весть, в сеть враг да впадется,
в ловитву, юже сокры, да вплетется
за свою прелесть.
Душа же моя да возвеселится
о Бозе Спасе, яко свободится
от сети ловчи.
Вся моя кости рекут: Живый в небе
Боже, кто и где есть подобен Тебе
в милосердьи?
Ты нища из рук креплших избавляяй,
от хищных врагов мене свобождаяй,
Сам един еси.
Лжесвидетели на мя клеветаху,
их же не ведех, мене вопрошаху,
да мя погубят.
За мою благость воздаша ми злая,
душу загнаша в места неплодная,
да гладом таю.
А внегда они стужаху ми зело,
смирях дух постом, а вретищем тело,
да Господь призрит.
Молитва моя в недра ми вратися,
Господь всещедрый милостив явися
за смиренье.
Яко ближнему тщахся угождати,
яко о братних случаех рыдати,
тако смиряхся.
Они же на мя собор сотвориша
со веселием, раны ми мыслиша,
аз аки не чух.
От любве должны вси разделишася,
оней же злобе не умилишася,
братия суще.
Подражнением люте мя дражниша,
искусиша мя и скрежет твориша
зубы своими.
О Господи мой! когда то узриши
и душу мою благоустроиши
от их злодейства?
Иже, яко льви гладнии, рыкают,
единородну мою умышляют
зубы терзати.
Аз в церкви мнозе тя исповедати
имам и в людех тяжцех восхваляти
за милость Твою.
Врагом, без правды ненависть имущым
на мя, очима си помизающым,
не даждь радости,
Яко мне убо мирно глаголаху,
а в сердцех лести на гнев помышляху,
да мя погубят.
Уста си на мя люте разширяху;
благо же, благо видят, – глаголаху, –
очеса наша.
Ты сия видев, да не премолчиши,
Боже, от мене да не отступиши,
во скорби суща.
Востани, Боже, сотвори суд правый,
Господи, зри прю, даждь суд: да лукавый
не веселится.
Да в сердцех своих о мне не вещают:
благо нам, благо; ни да обещают:
уже пожрем и́.
Срам да обымет, и да постыдятся
вси врази вкупе, иже веселятся
о злых ми сущих.
В студ и срамоту да суть облечени,
иже великим хулам изучени
мне глаголати.
Иже по моей правде поборают,
веселие и радость да познают
во сердцех своих.
Иже ми мира желают от Бога
выну да поют: буди слава многа
Господу Богу».
Аз же языком правду Ти хвалити
моим и славу имам возносити
в мире на всяк день.
