Господи Боже наш, Едине Благий и Человеколюбче, Едине Святый и на святых почиваяй, Иже верховному Твоему апостолу Петру явивый видением, ничтоже скверно, или нечисто мнети, от Тебе сотворенных на пищу и в наслаждение человеком и сосудом Твоим избранным апостолом Павлом вся чиста чистым заповедавай: Ты Сам, Владыко Пресвятый, призыванием страшнаго Пречистаго Твоего имене, и знамением Честнаго и Животворящаго Креста, благослови и очисти мя, раба Твоего (имя), оскверншагося от всякого неприязненнаго духа, от всякаго мечтания и гада ядовитаго, от всякаго беззакония и от всякия лести, от всякаго потвора и от всякия суеты, от всякаго недуга и всякия язи, и от всякаго противнаго злодейства диаволя. И ныне недостойнаго мене, раба Твоего (имя), сподоби по Твоему милосердию служити пречистым Твоим Таинам. И прежде очисти ми душу и тело от всякия скверны и остави всякое прегрешение, вольное и невольное, еже согреших во вся дни живота моего, делом, словом и помышлением, во дни и в нощи, и до нынешняго часа. И даждь ми, Господи, служение сие страшное небесных чинов, и причастие Пречистых Твоих Таин, не в суд, ни во осуждение, но в прощение грехов, и в Духа Святаго пришествие, и живот присносущныя радости, егоже уготовал еси истинным Твоим служебником. Сохрани мя, Владыко Всесильне, от всякаго греха и злобы, соблюди нескверна и непорочна от всякия проказы противнаго диавола; и даждь ми, Господи, Служити Тебе в преподобии и правде до последнаго дне и часа и скончания моего; Ты бо еси благословляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

Многомилостиве, нетленне, нескверне, безгрешне Господи, очисти мя, непотребнаго раба Твоего, от всякия скверны плотския и душевныя, и от невнимания и уныния моего прибывшую ми нечистоту, со инеми всеми беззаконии моими, и яви мя нескверна, Владыко, за благость Христа Твоего, и освяти мя нашествием Пресвятаго Твоего Духа; яко да возбнув от мглы нечистых привидений диавольских, и всякия скверны, сподоблюся чистою совестию отверсти скверныя моя и нечистая уста, и воспевати Всесвятое имя Твое, Отца и Сына и Святаго Духа, ныне и присно и во веки веков. Аминь.

Господи Иисусе Христе Боже наш, святаго апостола Твоего Петра от уз и темницы без всякаго вреда свободивый, прими, смиренно молим Ти ся, жертву сию милостивно во оставление грехов рабов Твоих (имена), в темницу всажденных, и молитвам их, яко Человеколюбец, всесильною Твоею десницею от всякаго злаго обстояния избави и на свободу изведи. Аминь.

Господи Боже спасения нашего, Сыне Бога Живаго, на херувимех носимый, превыше сый всякаго начала и власти, и силы, и господства, Ты еси велий и страшный над всеми сущими окрест Тебе, Ты еси сотворивый землю в крепости Твоей, и исправивый вселенную в премудрости Твоей, трясый поднебесную от оснований, столпы же ея неподвижны, глаголяй солнцу, и не возсияет, звезды же запечатлеяй, запрещаяй морю, и изсушай е, егоже ярость тает начала и власти, и камение сотрошася от Тебе. Врата медная стерл еси, и вереи железныя сломил еси, крепкаго связал еси, и сосуды его раздрал еси, мучителя крестом Твоим низложил еси, и змиа удицею вочеловечения Твоего привлекл еси, и узами мрака в тартаре посадив, связал еси. Сам убо, Господи, отжени и в бегство претвори всякое диавольское действо, и всякое сатанинское нахождение, всякий навет сопротивныя и належащия силы от крова сего, и от одержимых от него, и от обходящих под ним; вся сущия во дому сем сохрани, избавляя их от страха нощнаго, и стрелы летящия во дни, от вещи, во тьме преходящия, от сряща и демона полуденнаго. Яко Ты еси Боже утверждение мое, крепкий обладатель, князь мира, Отец будущаго века, и Царство Твое, Царство Вечное, Тебе Единаго есть царство и сила и слава, со Отцем и Святым Духом, ныне и присно и во веки веков. Аминь.

Боже Великий, и Страшный, и Дивный, Великий и Истинный, творяй вся и претворяй, и призираяй на землю, и творяй ю трястися, прикасайся горам, и дымятся, стрясуяй поднебесное от оснований, и столпы ея не движутся; основания земли подвизаяй и сия утверждаяй Своим манием, его же вся боятся и трепещут от лица силы Твоея, яко нестерпимый гнев, иже на нас, грешных, прещения Твоего, неизчетна же и неизследованна милость общения Твоего. Ты Сам помяни щедроты Твоя, Господи, и милости Твоя даждь нам, яко от века суть: утверди тварь, укрепи землю, устави колебания ея, утверди поколеблющуюся вселенную, и не погуби нас со беззаконьми наши, ниже осуди нас со грехами нашими в преисподняя земли, яко Ты еси Бог наш, Бог, еже миловати и спасати, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Тропарь, глас 8

Призираяй на землю, и творяй ю трястися, избави ны от страшнаго труса прещения, Христе Боже наш, низпосли нам богатыя милости Твоя, молитвами Богородицы, и спаси ны.

Кондак, глас 6

Избави труса тяжкаго всех нас, Господи, и язвы нестерпимыя, грех ради наших. Пощади, Господи, люди Твоя, яже стяжал еси Твоею Кровию, Владыко, и град не предаждь в погибель трусом страшным, инаго бо разве Тебе Бога не вемы, и воззови поющим: Аз есмь с вами и никтоже на вы.

Владыко Господи Боже наш, иже ипостасным и безначальным Твоим Словом, и животворящим, и единочестным Твоим Духом от не сущих, во еже быти, всяческая привел еси, положивый морю предел песок, и поставивый горы и долы правилом, пядию измеривый небо, и горстию содержай землю, меры и правила, пределы и чины видимей и чувственней сей давый твари, и времен изменения и возвраты солнечныя, и растворения стихий, манием Твоим содержай неизреченно. Сам, Всеблагий Царю, посети Твоею руку дела, и не отыми от нас милостей Твоих и щедрот Твоих, ниже разори завет Твой, остави грехов множество наших превосхождением множества щедрот Твоих; возведи Твою тварь к естественному чину, покажи нам обычную великия сея пучины тишину, и надлежащую бурю и смятение воздуха разсеки. Заповеждь ветром временное и согласное дыхание дати. Запрети волнению морскому, да станет дух бурный, и к тишине мятежная да преложатся; яко да Твоя дела и чудеса видят сходящии на море в кораблех и творящии делания в водах многих. Устрой е, Человеколюбче Владыко, Твоим непрекладным человеколюбием, иже Единороднаго Твоего Сына, и Господа нашего Иисуса Христа, изволивый быти человека, и сплавати святым Твоим учеником и апостолом, и запретити бури ветров, и морским утишатися волнам повелевай. Сам и ныне всякий сопротивный ветр успи, и волны укроти, и бурю утоли, и воздвигни нарочитая и благоключимая времена и ветры, Правитель и Помощник везде быв рабом Твоим, наставляяй я во пристанище спасения, иже Твое точию ведающе имя, и незнающе раз Тебе Бога иного, и к Твоей помощи выну призирающе, молитвами и моленьми Преблагословенныя Богородицы, Боговидных ангелов и всех святых, благоволением и благостию Единороднаго Твоего Сына, с Нимже благословен еси, и с Пресвятым, и Благим и Животворящим Твоим Духом, ныне и присно и во веки веков. Аминь.

Тропарь, глас 4

Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Кондак, глас 3

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе, яко Благодетеля и Творца, славяще, вопием: слава Тебе, Боже Всещедрый.