²Испове́мся Тебе́, Го́споди, всем се́рдцем мои́м, пове́м вся чудеса́ Твоя́. ³Возвеселю́ся и возра́дуюся о Тебе́, пою́ и́мени Твоему́, Вы́шний. ⁴Внегда́ возврати́тися врагу́ моему́ вспять, изнемо́гут и поги́бнут от лица́ Твоего́. ⁵Я́ко сотвори́л еси́ суд мой, и прю мою́, сел еси́ на Престо́ле, судя́й пра́вду. ⁶Запрети́л еси́ язы́ком, и поги́бе нечести́вый, и́мя его́ потреби́л еси́ в век и в век ве́ка. ⁷Врагу́ оскуде́ша ору́жия в коне́ц, и гра́ды разруши́л еси́, поги́бе па́мять его́ с шу́мом. ⁸И Госпо́дь во век пребыва́ет, угото́ва на суд Престо́л Свой, ⁹и Той суди́ти и́мать вселе́нней в пра́вду, суди́ти и́мать лю́дем в правоте́. ¹⁰И бысть Госпо́дь прибе́жище убо́гому, помо́щник во благовре́мениих, в ско́рбех. ¹¹И да упова́ют на Тя зна́ющии и́мя Твое́, я́ко не оста́вил еси́ взыска́ющих Тя, Го́споди. ¹²По́йте Го́сподеви, живу́щему в Сио́не, возвести́те во язы́цех начина́ния Его́. ¹³Я́ко взыска́яй кро́ви их помяну́, не забы́ зва́ния убо́гих. ¹⁴Поми́луй мя, Го́споди, виждь смире́ние мое́ от враг мои́х, вознося́й мя от врат сме́ртных. ¹⁵Я́ко да возвещу́ вся хвалы́ Твоя́ во врате́х дще́ре Сио́ни, возра́дуемся о спасе́нии Твое́м. ¹⁶Углебо́ша язы́цы в па́губе, ю́же сотвори́ша, в се́ти сей, ю́же скры́ша, увязе́ нога́ их. ¹⁷Зна́емь есть Госпо́дь судьбы́ творя́й, в де́лех руку́ свое́ю увязе́ гре́шник. ¹⁸Да возвратя́тся гре́шницы во ад, вси язы́цы забыва́ющии Бо́га. ¹⁹Я́ко не до конца́ забве́н бу́дет ни́щий, терпе́ние убо́гих не поги́бнет до конца́. ²⁰Воскресни́, Го́споди, да не крепи́тся челове́к, да су́дятся язы́цы пред Тобо́ю. ²¹Поста́ви, Го́споди, законоположи́теля над ни́ми, да разуме́ют язы́цы, я́ко челове́цы суть. ²²Вску́ю, Го́споди, отстоя́ дале́че, презира́еши во благовре́мениих, в ско́рбех? ²³Внегда́ горди́тися нечести́вому, возгара́ется ни́щий, увяза́ют в сове́тех, я́же помышля́ют. ²⁴Я́ко хвали́мь есть гре́шный в по́хотех души́ своея́, и оби́дяй благослови́мь есть. ²⁵Раздражи́ Го́спода гре́шный, по мно́жеству гне́ва своего́ не взы́щет: несть Бо́га пред ним. ²⁶Оскверня́ются путие́ его́ на вся́кое вре́мя, отъе́млются судьбы́ Твоя́ от лица́ его́: все́ми враги́ свои́ми облада́ет. ²⁷Рече́ бо в се́рдце свое́м: не подви́жуся от ро́да в род без зла. ²⁸Его́же кля́твы уста́ его́ по́лна суть, и го́рести и льсти, под язы́ком его́ труд и боле́знь. ²⁹Приседи́т в лови́тельстве с бога́тыми в та́йных, е́же уби́ти непови́ннаго, о́чи его́ на ни́щаго призира́ете. ³⁰Лови́т в та́йне, я́ко лев во огра́де свое́й, лови́т, е́же восхи́тити ни́щаго, восхи́тити ни́щаго, внегда́ привлещи́ и́ в се́ти свое́й. ³¹Смири́т его́, преклони́тся и паде́т, внегда́ ему́ облада́ти убо́гими. ³²Рече́ бо в се́рдце свое́м: забы́ Бог, отврати́ лице́ Свое́, да не ви́дит до конца́. ³³Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́. ³⁴Чесо́ ра́ди прогне́ва нечести́вый Бо́га? Рече́ бо в се́рдце свое́м: не взы́щет. ³⁵Ви́диши, я́ко Ты боле́знь и я́рость сматря́еши, да пре́дан бу́дет в ру́це Твои́, Тебе́ оста́влен есть ни́щий, си́ру Ты бу́ди помо́щник. ³⁶Сокруши́ мы́шцу гре́шному и лука́вому, взы́щется грех его́ и не обря́щется. ³⁷Госпо́дь Царь во век и в век ве́ка, поги́бнете язы́цы от земли́ Его́. ³⁸Жела́ние убо́гих услы́шал еси́, Го́споди, угото́ванию се́рдца их внят у́хо Твое́. ³⁹Суди́ си́ру и смире́нну, да не приложи́т ктому́ велича́тися челове́к на земли́.

¹На Го́спода упова́х, ка́ко рече́те души́ мое́й: превита́й по гора́м, я́ко пти́ца? ²Я́ко гре́шницы наляко́ша лук, угото́ваша стре́лы в ту́ле, состреля́ти во мра́це пра́выя се́рдцем. ³Зане́ я́же Ты соверши́л еси́, они́ разруши́ша, пра́ведник же что сотвори́? Госпо́дь во хра́ме святе́м Свое́м. ⁴Госпо́дь, на небеси́ Престо́л Его́, о́чи Его́ на ни́щаго призира́ете, ве́жди Его́ испыта́ете сы́ны челове́ческия. ⁵Госпо́дь испыта́ет пра́веднаго и нечести́ваго, любя́й же непра́вду ненави́дит свою́ ду́шу. ⁶Одожди́т на гре́шники се́ти, огнь и жу́пел, и дух бу́рен, часть ча́ши их. ⁷Я́ко пра́веден Госпо́дь, и пра́вды возлюби́, правоты́ ви́де лице́ Его́.

Слава:

²Спаси́ мя, Го́споди, я́ко оскуде́ преподо́бный, я́ко ума́лишася и́стины от сыно́в челове́ческих. ³Су́етная глаго́ла ки́йждо ко и́скреннему своему́: устне́ льсти́выя в се́рдце, и в се́рдце глаго́лаша зла́я. ⁴Потреби́т Госпо́дь вся устны́ льсти́выя, язы́к велере́чивый. ⁵Ре́кшия: язы́к наш возвели́чим, устны́ на́ша при нас суть, кто нам Госпо́дь есть? ⁶Стра́сти ра́ди ни́щих и воздыха́ния убо́гих, ны́не воскресну́, глаго́лет Госпо́дь, положу́ся во спасе́ние, не обиню́ся о нем. ⁷Словеса́ Госпо́дня, словеса́ чи́ста, сребро́ разжже́но, искуше́но земли́, очище́но седмери́цею. ⁸Ты, Го́споди, сохрани́ши ны и соблюде́ши ны от ро́да сего́ и во век. ⁹О́крест нечести́вии хо́дят: по высоте́ Твое́й умно́жил еси́ сы́ны челове́ческия.

²Доко́ле, Го́споди, забу́деши мя до конца́? Доко́ле отвраща́еши лице́ Твое́ от мене́? ³Доко́ле положу́ сове́ты в души́ мое́й, боле́зни в се́рдце мое́м день и нощь? Доко́ле вознесе́тся враг мой на мя? ⁴При́зри, услы́ши мя, Го́споди Бо́же мой, просвети́ о́чи мои́, да не когда́ усну́ в смерть, ⁵да не когда́ рече́т враг мой: укрепи́хся на него́. ⁶Стужа́ющии ми возра́дуются, а́ще подви́жуся. ⁷Аз же на ми́лость Твою́ упова́х. Возра́дуется се́рдце мое́ о спасе́нии Твое́м, воспою́ Го́сподеви, благоде́явшему мне, и пою́ и́мени Го́спода Вы́шняго.

¹Рече́ безу́мен в се́рдце свое́м: несть Бог. Растле́ша и омерзи́шася в начина́ниих: несть творя́й благосты́ню. ²Госпо́дь с небесе́ прини́че на сы́ны челове́ческия, ви́дети, а́ще есть разумева́яй или́ взыска́яй Бо́га. ³Вси уклони́шася, вку́пе неключи́ми бы́ша: несть творя́й благосты́ню, несть до еди́наго. ⁴Ни ли́ уразуме́ют вси де́лающии беззако́ние, снеда́ющии лю́ди моя́ в снедь хле́ба? Го́спода не призва́ша. ⁵Та́мо убоя́шася стра́ха, иде́же не бе страх, я́ко Госпо́дь в ро́де пра́ведных. ⁶Сове́т ни́щаго посрами́сте, Госпо́дь же упова́ние его́ есть. ⁷Кто даст от Сио́на спасе́ние Изра́илево? ⁸Внегда́ возврати́т Госпо́дь плене́ние люде́й Свои́х, возра́дуется Иа́ков и возвесели́тся Изра́иль.

Слава:

¹Го́споди, кто обита́ет в жили́щи Твое́м? Или́ кто всели́тся во святу́ю го́ру Твою́? ²Ходя́й непоро́чен и де́лаяй пра́вду, глаго́ляй и́стину в се́рдце свое́м. ³И́же не ульсти́ язы́ком свои́м, и не сотвори́ и́скреннему своему́ зла, и поноше́ния не прия́т на бли́жния своя́. ⁴Уничиже́н есть пред ним лука́внуяй, боя́щия же ся Го́спода сла́вит, клены́йся и́скреннему своему́ и не отмета́яся. ⁵Сребра́ своего́ не даде́ в ли́хву и мзды на непови́нных не прия́т. Творя́й сия́ не подви́жится во век.